Hydref 1, 2026
Rhannu:
Codi Arian Campus: Medi
Mae mis Medi wedi bod yn fis gwych arall o godi arian a chefnogi Elusen Iechyd Bae Abertawe. Rydym wedi gweld amrywiaeth eang o weithgareddau, gan gynnwys noson gwis, gwirfoddoli yn y gweithle, diwrnod golff a noson disgo!
Diolch i bawb sydd wedi cefnogi ein helusen GIG leol y mis hwn. Mae eich ymdrechion codi arian yn ein helpu i fynd y tu hwnt i gyllid craidd y GIG, gan gefnogi cleifion, teuluoedd a staff ledled Bae Abertawe.
Cymuned cwis â chalon fawr
Mae’r hyn a ddechreuodd fel cwis tafarn wythnosol wedi datblygu’n draddodiad codi arian hirsefydlog, gyda’r aelodau sy’n cymryd rhan yng Nghwis Tafarn Clwb Ceidwadwyr Pontarddulais wedi codi £16,250 ar gyfer Bwrdd Iechyd Prifysgol Bae Abertawe dros y 15 mlynedd diwethaf.
Yn fwyaf diweddar, rhoddodd y Cadeirydd, Eirwyn Evans, a’i wraig, Hilary, £500 i gefnogi gwaith y gwasanaethau a achubodd eu bywydau. Rhoddodd Eirwyn hanner y swm i Ward 11 Haematoleg, a rhoddodd Hilary ei hanner i’r Gronfa Ymchwil Gastroberfeddol, gan gefnogi gwaith Dr Daniel Hanratty, y llawfeddyg a achubodd fywyd Hilary.
Yn ddiweddar, cafodd Hilary lawdriniaeth am ganser y coluddyn yn Ysbyty Singleton, tra cafodd Eirwyn driniaeth ar Ward 11 Haematoleg. Er mwyn cydnabod y gofal a gawsant, penderfynodd y cwpl rannu eu rhodd o £500 yn gyfartal rhwng y ddwy ward.
Bob dydd Sul, mae pobl leol o Bontarddulais yn talu £2 i gymryd rhan yn y cwis a’r raffl. Pan fydd y gronfa’n cyrraedd £500, caiff un tîm ddewis ble bydd yr arian yn mynd.
“Tro ein tîm ni oedd hi i ddewis yr elusen, ac oherwydd bod Hilary a minnau’n mynd drwy hyn, penderfynon ni mai nawr oedd yr amser i roi rhywbeth yn ôl i’r ysbyty.”
Mae’r rhodd ddiweddaraf hon yn ychwanegu at hanes hir o gefnogi ein helusen GIG leol, gan gynnwys Gofal Dwys i’r Newydd-anedig, yr Uned Gofal y Fron ac Uned Therapi Dwys Ysbyty Treforys. Nid yn unig y mae £16,250 wedi’i godi ar gyfer cronfeydd amrywiol Elusen Iechyd Bae Abertawe, ond mae Eirwyn yn amcangyfrif bod y cwis wedi codi tua £40,000 i gyd ers iddo ddechrau, gyda rhoddion hefyd yn cefnogi banciau bwyd, ysgolion, grwpiau cymunedol, y Sefydliad Cenedlaethol Brenhinol Badau Achub (RNLI) a llawer o achosion eraill.
Rydym yn hynod ddiolchgar i Eirwyn, Hilary a phawb sy’n rhan o Gwisi Tafarn Clwb Ceidwadwyr Pontarddulais am wneud haelioni ac ysbryd cymunedol yn rhan mor bwysig o’u traddodiad dydd Sul.
Tîm Barclays yn mynd yr ail filltir
Drwy’r ymdrech hon, cododd Kimberley, Alex, Michelle, Olivia a Donna swm anhygoel o £5,000 ar gyfer yr Apêl Mynd y Filltir Ychwanegol ar Gyfer Canser.
Cododd y twrnamaint arian ar gyfer ein Hapêl Mynd y Filltir Ychwanegol ar Gyfer Canser, a gyrhaeddodd ei tharged o £200,000 ar y diwrnod, diolch i ymdrechion ar y cyd ein cefnogwyr anhygoel. Chwaraeodd tîm Barclays eu rhan y tu ôl i’r llenni, gan roi o’u hamser a’u hegni i helpu i sicrhau llwyddiant y digwyddiad.
I Kimberley, roedd cefnogi’r apêl yn arbennig o bersonol, ar ôl i’w thad hithau gael profiad o frwydro yn erbyn canser:
“Cafodd fy nhad ganser a chollodd ei frwydr yn 2011. Roedd yn ymweld â Singleton yn aml ac roeddwn i eisiau rhoi rhywbeth yn ôl.”
Dywedodd Cathy Stevens, Swyddog Elusen Cymorth Cymunedol yn Elusen Iechyd Bae Abertawe:
“Roedd y gefnogaeth a gawsom gan dîm Barclays yn hollol wych. Buont yn cymryd rhan lawn yn y digwyddiad, gan helpu gyda phopeth ar y diwrnod a gwneud cyfraniad gwirioneddol at ei lwyddiant. Mae partneriaethau fel hyn yn dangos yr hyn y gellir ei gyflawni pan fydd busnesau, gwirfoddolwyr a chymunedau’n dod at ei gilydd dros achos cyffredin.”
Mae’r tîm eisoes wedi dweud eu bod am ddychwelyd y flwyddyn nesaf, gan obeithio dod â hyd yn oed mwy o gydweithwyr Barclays i wirfoddoli gyda nhw!
Blwyddyn anhygoel arall i Ddiwrnod Golff MS Carwyn
Unwaith eto, mae Carwyn Lewis a’i deulu wedi mynd y tu hwnt i’r disgwyl i gefnogi Cronfa Niwroleg MS yn Ysbyty Treforys, gan godi swm anhygoel o £5,800 yn niwrnod golff eleni.
Yn ei bedwaredd flwyddyn bellach, daeth y digwyddiad yng Nghlwb Golff Sir Gaerfyrddin â ffrindiau, teulu a chefnogwyr ynghyd sy’n rhannu angerdd Carwyn dros wneud gwahaniaeth.
Diolch o galon i Carwyn, ei deulu, ei ffrindiau a phawb a gefnogodd y diwrnod. Mae eich ymroddiad a’ch haelioni parhaus yn helpu i gefnogi gwaith pwysig i gleifion a staff yn Ysbyty Treforys.
Rydym eisoes yn edrych ymlaen at y pumed digwyddiad fis Mai nesaf!
Shine Cymru yn goleuo Cwtsh Natur
Mae’r oedolion ifanc yn Shine Cymru Life Skills wedi bod yn cael digon o hwyl wrth godi arian ar gyfer ein Hapêl Cwtsh Natur!
Yn eu Noson Disgo ddiweddar, cynhaliodd y grŵp raffl a chodwyd £120 tuag at yr apêl. Bu’r oedolion ifanc yn cymryd rhan lawn yn y gwaith codi arian ac yn mwynhau noson wych gyda’i gilydd.
Mae Cwtsh Natur hefyd wedi’i ddewis yn Elusen y Flwyddyn gan Shine Cymru Life Skills, ac mae’r grŵp wedi gosod targed uchelgeisiol o godi £1,000 erbyn diwedd y flwyddyn. Maent eisoes ymhell ar eu ffordd, ar ôl codi £600 hyd yma!
Dywedodd Hayley, o Shine Cymru Life Skills:
“Mae ein hoedolion ifanc yn codi arian bob blwyddyn ar gyfer elusennau amrywiol, ac eleni rydym wedi dewis codi arian ar gyfer Cwtsh Natur gan ein bod yn credu bod hwn yn achos hynod werth chweil sy’n helpu teuluoedd yn y gymuned leol.”
Diolch o galon i bawb yn Shine Cymru am ddewis cefnogi Cwtsh Natur a’n helpu i greu gofod awyr agored mwy croesawgar a bywiog i blant a theuluoedd lleol.
Rydym mor ddiolchgar i bawb sydd wedi codi arian ar gyfer Elusen Iechyd Bae Abertawe y mis hwn. Mae pob gweithgaredd codi arian, her a digwyddiad yn ein helpu i barhau i gefnogi cleifion, teuluoedd a staff ledled Bwrdd Iechyd Prifysgol Bae Abertawe.
A yw ward neu adran erioed wedi darparu gofal eithriadol i chi neu rywun annwyl i chi? Hoffech chi gefnogi elusen leol a fydd yn cael effaith uniongyrchol ar ein hysbytai? Gallwch greu tudalen codi arian, sefydlu rhodd reolaidd neu gysylltu â ni heddiw am ragor o wybodaeth!