Funds in Focus

Wedi’i leoli yn Uned Llosgiadau Pediatrig a Llawfeddygaeth Blastig Ysbyty Treforys, Clwb Llosgiadau’r Ddraig Gymreig yw’r unig glwb o’i fath yng Nghymru ac mae wedi bod yn cefnogi plant ers dros 22 mlynedd. Mae’r clwb yn dibynnu’n llwyr ar roddion, grantiau a nawdd i greu mannau diogel a chynhwysol i bobl ifanc sy’n gwella o anafiadau llosgiadau neu bryderon ynghylch delwedd y corff, gan eu helpu i ailadeiladu eu hyder a’u hunan-barch y tu hwnt i amgylchedd yr ysbyty.

Mae Canolfan Plant Hafan Y Môr yn Ysbyty Singleton yn ganolfan un stop i blant ag anghenion ychwanegol, gan ddod â phediatreg, ffisiotherapi, therapi galwedigaethol, a therapi iaith a lleferydd ynghyd o dan yr un to. Mae hefyd yn cynnal clinigau arbenigol, o orthopedeg ac orthoteg i sblintio aelodau uchaf, yn ogystal â llyfrgell deganau i deuluoedd. Diolch i gefnogaeth elusennol, mae gardd y ganolfan wedi’i thrawsnewid yn ddiweddar yn ofod mwy disglair a chroesawgar. 

Mae Elusen Oncoleg y Pen a’r Gwddf (HANOC) yn elusen ymroddedig sy’n cefnogi anghenion unigol cleifion canser y pen a’r gwddf yng Nghanolfan Canser De-orllewin Cymru. Nod HANOC yw gwella profiad cleifion drwy ddarparu offer a chynhyrchion hanfodol i reoli sgil-effeithiau diagnosis a thriniaeth, gan gynnwys cynhyrchion ceg sych, nebiwlyddion, cymhorthion cyfathrebu, a phecynnau cymorth gwybodaeth. Mae arian a godir hefyd yn helpu i ddatblygu grwpiau cymorth yn y dyfodol. Yn ddiweddar, derbyniodd HANOC ei rhodd fawr gyntaf o £6,270 gan ddigwyddiad codi arian Clwb Golff Bae Langland a gynhaliwyd gan gleifion, gan dynnu sylw at effaith haelioni cymunedol ar wella gofal i gleifion.

Mae’r gwasanaeth Gynaecoleg ac Iechyd Menywod yn darparu asesiad a gofal arbenigol i gleifion â symptomau cymhleth y bledren, y coluddyn a phrolaps, ochr yn ochr â chyflyrau wrogynaecolegol datblygedig. Gyda ffocws ar fynediad cynnar a chymorth personol, mae’r tîm yn aml yn gallu helpu cleifion i reoli eu cyflyrau trwy ddulliau ceidwadol, gan leihau’r angen am lawdriniaeth. Mae cronfeydd elusennol yn chwarae rhan hanfodol wrth gefnogi’r weledigaeth hon, gan helpu i ddarparu offer, ymchwil, addysg cleifion, a mentrau lles i sicrhau bod pob claf yn derbyn y gofal gorau posibl. 

Mae’r Uned Gofal Dwys Newyddenedigol (NICU) yn Ysbyty Singleton yn darparu gofal arbenigol i fabanod newydd-anedig cynamserol a rhai sy’n wael iawn o gyn gynted â 22 wythnos o feichiogrwydd, gan wasanaethu teuluoedd ledled Abertawe, Gorllewin Cymru a rhannau o Gwm Taf. Fel canolfan atgyfeirio a hyfforddi ranbarthol, mae’r tîm yn darparu gofal achub bywyd, dwys, dibyniaeth uchel, a gofal trosglwyddol, ochr yn ochr â dilyniant niwroddatblygiadol hanfodol i raddedigion Uned Gofal Dwys Newyddenedigol. Mae rhoddion yn helpu i ariannu cefnogaeth i deuluoedd gan gynnwys bwyd, cludiant a llety, yn ogystal ag offer arbenigol, hyfforddiant ac adnoddau sy’n gwella gofal a lles babanod a’u teuluoedd. Mae pob cyfraniad yn gwneud gwahaniaeth parhaol ar ddechrau bywyd. 

Yn Ysbyty Treforys, mae ein wardiau pediatrig yn gofalu am blant a phobl ifanc o ddim ond dyddiau oed i 16 oed, gan ddarparu popeth o asesiadau brys a llawdriniaeth i ofal canser, llosgiadau a chymorth dibyniaeth fawr. Gyda thua 45 o dderbyniadau bob dydd, mae staff bob amser yn brysur yn gofalu am rai o’r cleifion mwyaf agored i niwed. Er mai triniaeth feddygol yw’r flaenoriaeth, mae cronfeydd elusennol yn ein helpu i ddod â chysur, tynnu sylw a rhoi gobaith i blant a theuluoedd yn ystod cyfnodau brawychus. O deganau, celf a chrefft, ac offer synhwyraidd i gyffyrddiadau cartrefol fel ystafelloedd chwarae, mannau tawel, pramiau a phethau ymolchi, mae rhoddion yn trawsnewid profiad yr ysbyty ac yn gwneud i arhosiad anodd deimlo ychydig yn fwy disglair.