Ymwelodd y diddanwr a’r darlledwr poblogaidd o Abertawe, Kev Johns, â Ward Cemotherapi (Ward 9) yn Ysbyty Singleton ar ddydd Llun, 10 Tachwedd 2025, gan ddod â gwên, chwerthin a thipyn o hwyl yr ŵyl i’r cleifion a’r staff.

Roedd yr ymweliad yn rhan o daith hyrwyddo Kev cyn panto eleni yn Nghanolfan y Celfyddydau Grand Abertawe, sef Aladdin, a fydd yn rhedeg o’r 6ed o Ragfyr hyd at y 4ydd o Ionawr. Bydd Kev yn camu ar y llwyfan fel y Mona Manky eiconig. Ond y tu hwnt i’r gwisgoedd lliwgar a’r chwerthin mawr, roedd gan yr ymweliad ystyr llawer dyfnach.

Fel llysgennad i Apêl Mynd y Filltir Ychwanegol ar Gyfer Canser Elusen Iechyd Bae Abertawe, mae cysylltiad Kev â Ward 9 yn un personol iawn. Ar ôl cael diagnosis o ganser cam 4 bedair blynedd yn ôl, mae e wedi cael 42 o driniaethau ac yn parhau i dderbyn imiwnotherapi bob mis yn Ysbyty Singleton. Bellach, mae’n ffynnu ac yn llawn diolchgarwch, ac yn angerddol o ran cefnogi’r rhai sy’n wynebu eu taith eu hunain gyda chanser – a’r staff anhygoel sy’n eu gofalu.

“Dw i jest eisiau dweud diolch,” meddai Kev. “Os ydw i’n gallu dod â mymryn o lawenydd i wynebau’r staff sy’n gweithio mor galed ar Ward 9 – y bobl dw i mor ddyledus iddyn nhw am y gofal, y driniaeth a’r gefnogaeth maen nhw’n eu rhoi i mi – yna dw i’n hapus. Dw i wrth fy modd gyda nhw i gyd. Maen nhw’n bobl anhygoel, o Mary ar y dderbynfa i’r holl nyrsys a’r meddygon sy’n edrych ar ein holau ni.”