Mae trigolion Bae Abertawe yn cael eu hannog i godi i’r her dros achos pwysig y gwanwyn hwn wrth i Her 30 Milltir ym Mis Mai ddychwelyd – y tro hwn gyda ffocws ar drawsnewid bywydau plant drwy therapi cynhwysol sy’n seiliedig ar natur.

Mae’r her rithwir dros fis yn gwahodd cyfranogwyr o Abertawe, Castell-nedd, Port Talbot a’r ardaloedd cyfagos i gwblhau 30 milltir yn ystod mis Mai tra’n codi o leiaf £30 drwy eu tudalen codi arian ar-lein. Bydd pob cam yn cefnogi Apêl Cwtsh Natur. Fel cymhelliant, bydd y 30 codwr arian cyntaf i gyrraedd £100 yn derbyn crys-t am ddim ac anrheg dirgel.

Dan arweiniad Elusen Iechyd Bae Abertawe, nod Apêl Cwtsh Natur yw codi £200,000 i drawsnewid gardd Canolfan Blant Castell-nedd Port Talbot yn ofod therapi awyr agored diogel, llawn elfennau synhwyraidd ar gyfer miloedd o blant lleol ag anghenion ychwanegol.

Y tu hwnt i’r milltiroedd a’r targedau codi arian, mae 30 Milltir ym Mis Mai yn tynnu sylw at symudiad lleol cynyddol o ddefnyddio gweithgarwch bob dydd i adeiladu cymuned iachach tra’n cefnogi elusen GIG leol yn uniongyrchol. Dywedodd Catrin Jones, Swyddog Codi Arian ac Ymgysylltu Digidol Elusen Iechyd Bae Abertawe:

“Y llynedd gwelsom gyfranogiad gwych gan staff y GIG a chefnogwyr, felly rydym yn edrych ymlaen yn fawr at weld sut y gall digwyddiad eleni gael effaith ar Apêl Cwtsh Natur a rhoi’r hwb sydd ei angen arni i gyrraedd y targed codi arian o £200,000.”

Wedi’i lansio y llynedd, rhagorodd 30 Milltir ym Mis Mai ar bob disgwyliad. Denodd yr her 93 o gyfranogwyr – gan gynnwys 57 o staff y Bwrdd Iechyd – a chodwyd swm trawiadol o £6,129 tuag at apêl flaenorol yr elusen. Profodd hefyd y rôl bwerus y gall gweithredu ar y cyd a mentrau sy’n canolbwyntio ar lesiant ei chwarae wrth gynyddu ymwybyddiaeth ac effaith.

Roedd cyfranogiad staff y GIG yn ffactor allweddol yn y llwyddiant, gyda thimau ar draws y Bwrdd Iechyd yn cofleidio’r her. Yn nodedig, cododd tîm staff NICU £1,500 drwy eu hymdrechion ar y cyd, gan ddangos sut y gall gwaith tîm a phwrpas cyffredin gryfhau canlyniadau’n sylweddol. Chwaraeodd arweinwyr uwch ran amlwg hefyd. Cymerodd y Prif Weithredwr, Abi Harris, a’r Tîm Gweithredol ran, gan atgyfnerthu’r cysylltiad rhwng llesiant staff ac ymgysylltu cymunedol. Bydd eu cyfranogiad yn parhau eleni, gyda’r gobaith o ysbrydoli hyd yn oed mwy o gyfranogiad ar draws y Bwrdd Iechyd.

Gall cyfranogwyr gerdded, rhedeg, beicio neu symud mewn unrhyw ffordd sy’n addas iddynt, gan wneud y her yn hygyrch i bob lefel o ffitrwydd. Mae hyblygrwydd y fformat rithwir yn sicrhau y gall unrhyw un gymryd rhan, naill ai’n unigol neu fel rhan o dîm.

Mae cofrestru bellach ar agor drwy Enthuse, ac mae’r trefnwyr yn annog unigolion, teuluoedd, ysgolion, gweithleoedd a grwpiau cymunedol i gofrestru’n gynnar a dechrau cynllunio eu milltiroedd.

Gyda momentwm eisoes yn tyfu, mae 30 Milltir ym Mis Mai ar fin dod â chymuned Bae Abertawe at ei gilydd unwaith eto i helpu i greu gofod i blant lleol sy’n cefnogi therapi, yn annog symudiad, ac yn meithrin llesiant.

Allwn ni gyfrif ar eich cefnogaeth? Cofrestrwch heddiw – ar eich pen eich hun neu fel rhan o dîm!

Cofrestrwch nawr

Dysgwch fwy