Mae Cyn-Faer Cyngor Bwrdeistref Sirol Castell-nedd Port Talbot, y Cynghorydd Matt Crowley (2024 – 2025) wedi cyhoeddi fod cyfanswm o £12,000 wedi’i godi i gefnogi dwy elusen GIG leol, ar ôl blwyddyn ymroddedig o ddigwyddiadau a mentrau cymunedol.

Rhennir yr arian yn gyfartal rhwng Gwasanaeth Podiatreg Ysbyty Treforys a’r Clinig Clwyfau yng Nghanolfan Adnoddau Baglan. Mae’r ddau achos da yn rhoi hwb hanfodol i wasanaethau gofal iechyd a phrosiectau llesiant staff yn yr Ymddiriedolaeth leol.

Uchafbwyntiau Codi Arian

Dawns Elusennol y Maer: Prif ddigwyddiad y flwyddyn, a gynhaliwyd yng Ngwesty Blanco’s Port Talbot, oedd yn dwyn ynghyd fusnesau lleol a phreswylwyr ar gyfer noson o ocsiwn ac adloniant.

Heriau Cymunedol: Cyfres o ddigwyddiadau cyhoeddus yn cynnwys ‘Ras y Maer Parc Margam 5k a10k’, ffeiriau tymhorol, a heriau chwaraeon lleol a ymgysylltodd â channoedd o breswylwyr.

Partneriaethau busnes: Cyfraniadau hael gan gwmnïau lleol a ddewisodd Apêl y Maer i fod yn ‘Elusen y Flwyddyn’. Rhaid crybwyll yn arbennig Mr a Mrs Hopkins o Westy Blanco’s am hwyluso’r ddawns elusennol.

Yn ôl y Cyn-Faer, y Cynghorydd Crowley:

“Bu’n fraint lwyr gallu tystio i haelioni rhyfeddol ein cymuned. Mae codi £12,000 ar gyfer arwyr ein GIG yn dyst i’r parch mawr a roddir i’r elusennau hyn.

“Ar ôl gweld â’m llygaid fy hunan y gwaith anhygoel mae ein timau meddygol yn ei wneud, rwyf wrth fy modd y bydd yr arian hwn yn helpu i ddarparu’r gofal ‘amgylchynol’ ychwanegol yna sy’n gwneud cymaint o wahaniaeth i gleifion a’u teuluoedd.”

Ychwanegodd Rheolwr Elusennol Bwrdd Iechyd Prifysgol Bae Abertawe (SBUHB), Lewis Bradley:

“Rydyn ni’n eithriadol ddiolchgar am gefnogaeth y Cynghorydd Crowley. Bydd y rhodd yn ein galluogi i ariannu prosiectau sy’n bodoli y tu fas i ariannu craidd y GIG.”