Mae teulu diolchgar wedi codi £3,000 ar gyfer Uned Gofal Dwys Newyddenedigol (NICU) Ysbyty Singleton ar ôl i’w mab fach dderbyn gofal achub bywyd yn dilyn geni cynamserol.

Croesawodd Jess Phillips a’i phartner Jack eu mab Brody ym mis Awst 2024, yn ddim ond 28 wythnos oed ac yn pwyso dim ond 3 phwys. Wynebodd Brody fach gyfres o heriau iechyd difrifol yn ei ddyddiau cyntaf, gan gynnwys ysgyfaint heb ddatblygu’n llawn, sawl trallwysiad gwaed, gwaedlifau ar yr ymennydd a gwaedlif ar ei ysgyfaint. Diolch i ymroddiad a gofal di-baid tîm y NICU, llwyddodd Brody i wella a’i ryddhau ym mis Hydref 2024 – gan ddod adref ar ocsigen cyn gwneud adferiad llawn yn gynharach eleni.

Fel ffordd o ddweud diolch i’r meddygon a’r nyrsys a ofalodd mor gariadus amdano, cymerodd Jack a’u ffrind teuluol Harry Phillips ran yn farathon Long Course Weekend (LCW) yn Nhrefdraeth ac agorodd dudalen godi arian er mwyn cefnogi NICU Singleton. Gyda’i gilydd codasant £3,000, a roddwyd ar ddydd Mercher 17 Medi i Elusen Iechyd Bae Abertawe i helpu prynu offer newydd i’r NICU.

Mae mam Brody, Jess, yn angerddol am roi rhywbeth yn ôl i NICU Singleton:

“Allwn ni byth roi i eiriau pa mor ddiolchgar ydym ni i bob aelod o’r staff a ofalodd mor gariadus am Brody. Nhw yw ein harwyr go iawn, ac oni bai amdanynt, fyddem ni ddim â’n bachgen heddiw. Dyma ffordd fach o ddweud diolch am bopeth wnaethant i ni.

Dywedodd Lewis Bradley, Rheolwr Cefnogi Elusennau yn Elusen Iechyd Bae Abertawe:

“Mae’n hyfryd gweld cymuned Arberth a Gorllewin Cymru’n dod ynghyd i gefnogi achos sy’n agos iawn at galonnau cymaint o bobl. Mae teulu a ffrindiau Brody wedi codi £3,000 anhygoel, a fydd yn gwneud gwahaniaeth parhaol i fabanod cynamserol yn y dyfodol, eu teuluoedd, a’r staff ymroddedig yn ein NICU. Roedd yn arbennig iawn croesawu Brody a’i deulu yn ôl i’r ward i gyflwyno’r rhodd hael a chysylltu eto gyda’r nyrsys a ofalodd amdano yn ystod yr wythnosau anodd hynny.”

Mae Elusen Iechyd Bae Abertawe yn codi arian ar gyfer Uned Gofal Dwys Newyddenedigol Ysbyty Singleton i ariannu adnewyddu’r llety ar y safle i deuluoedd NICU. Dysgwch ragor am sut mae apêl Cwtsh Clos yn cefnogi rhieni yn ystod eu taith NICU.