Mae gofalu am rieni babanod cynamserol yn eu galluogi i fod ar y ffurf uchaf i helpu eu rhai bach, meddai mam ddiolchgar.

Tanlinellodd Bethan Wyn Evans bwysigrwydd llety teuluol i’r rhai sydd â babi neu fabanod yn yr Uned Gofal Dwys Newyddenedigol (UGDN) pan rannodd hanes dechrau trawmatig ei merch ei hun i fywyd.

Mae Bethan, o Langynnwr yn Sir Gaerfyrddin, wedi siarad allan i helpu i gefnogi ein Apêl Cwtsh Clos, sy’n anelu at godi £160,000 i adnewyddu ac ailarfogi teras o bum cartref ar dir Ysbyty Singleton, sydd ar gael i rieni nad ydynt yn byw gerllaw.

Dywedodd: “Pan wnaethon ni ddarganfod ein bod ni’n gallu cael llety ar y safle fe wnaeth fyd o wahaniaeth.

“Er mai dim ond rhyw 40 munud i ffwrdd rydyn ni’n byw, mae teithio’r amser hwnnw, a threulio 15 i 20 awr y dydd wrth ochr gwely eich babi, ar ben y teithio, yn ormod.

“Er mwyn i’r rhieni allu bod ar y ffurf uchaf ar gyfer eu babanod, roedd y llety oedd gennym ni yn Singleton mor bwysig. Roedden ni’n ddiolchgar iawn am hynny.”

Tra’n dal yn y groth roedd merch Bethan, Mari Glyn, wedi cael diagnosis o gyflwr sy’n peryglu bywyd o’r enw chylothorax cynhenid, a olygai bod angen triniaeth arbenigol arni yn Ysbyty St Michael’s ym Mryste, lle cafodd ei geni ym mis Rhagfyr 2021.

Tua saith wythnos oed trosglwyddwyd Mari fach i’r UGDN yn Ysbyty Singleton a rhoddwyd llety i’w rhieni yn Cwtsh Clos yna ac yn ddiweddarach pan ddychwelodd am lawdriniaeth llygaid – gan dreulio pedair wythnos yno i gyd.

Y newyddion gwych yw bod Mari, sydd bellach yn ddwy, yn gwneud yn ysblennydd.

I ddweud diolch am ei gofal bydd Carwyn, tad Mari Glyn, a grŵp o gefnogwyr yn rhedeg y 110 milltir o Ysbyty St Michael’s, Bryste, cartref i Llangunnor fis Awst yma mewn pedwar diwrnod.

Fe fyddan nhw’n cynnwys stop yn Ysbyty Singleton.

Dywedodd Bethan: “Mae’r tîm ym Mae Abertawe a Singleton yn cytuno bod angen adnewyddu’r cartrefi. Dyna pam rydym wedi dewis Apêl Cwtsh Clos fel un o’r elusennau yr ydym yn codi arian ar eu cyfer.”

Bydd stori’r teulu hefyd yn ymddangos mewn rhaglen ddogfen awr o hyd ar Heno ar S4C ar Awst 26ain.